Sakop sa NPA mitahan sa Canlaon Police dala ang pusil

Sakop sa rebeldeng New People’s Army (NPA) nga naglihok sa Negros Oriental nitahan sa kapulisan sa dakbayan sa Canlaon, Negros Oriental.

Ang nitahan gitago lang sa ngan nga “Ka Rodgen” kompirmadong sakop sa Section Guerilla Unit (SGU) ubos sa Central Negros (CN)1, personal nga gihangop sa hepe sa Canlaon Police Station niadtong Miyerkules, Mayo 25, 2022.

Lakip sa iyang pagtahan ang iyang armas nga usa ka .38 caliber revolver.

Si Police Lieutenant Colonel Andeza, hepe sa Canlaon Police, maoy personal nga nidawat sa pagtahan ni Ka Rodgen uban sa mga sakop sa kasundalohan sa 62nd Infantry Battalion sa Philippine Army.

Matud ni Andeza nga sa iyang pakighinabi sa kanhi sakop sa walhong grupo, siya niangkon nga ang iyang pagtahan sa kagamhanan tungod sa nakita niya nga seryoso ang kasamtangang administrasiyon sa pagpahunong sa terorismo.

Dugang sa kanhi sakop sa NPA nga duna na usab siyay mga kanhi kauban nga nangadakpan na dihang gironda sa kapulisan pinaagi sa pag-serve og search warrant.

Ang hepe sa Canlaon Police nanawagan sa aktibo pa sa walhong grupo nga mobalik na sa sabakan sa balaod aron magpuyo ang matag habig nga malinawon.

Ang Lalawigan sa Negros Oriental maoy dapit sa Central Visayas nga duna pay dakong suliran sa insurhensiya sa Central Visayas.